Бер нисә йылдан Өфөлә яңы музей барлыҡҡа киләсәк. Ағас архитектура сәнғәтен сағылдырасаҡ музей 10 гектарҙан ашыу ерҙе биләйәсәк, 2 тематик зонаға бүленәсәк. Тәүгеһендә Өфөлә әле һүтеп алынған ундан ашыу боронғо йорт ҡуйыласаҡ. Шулай уҡ бөтөнләй емерелгән бер нисә объект тап музей өсөн киренән тергеҙеләсәк. Халыҡ-ара ауыл тип исемләнгән икенсе бүлектә Ер шарында йәшәүсе төрлө халыҡтарҙың өйҙәре ҡуйыласаҡ. Улар араһында ҡытай, япон, фин, корея һәм немец халыҡтарының ихаталары менән танышырға мөмкин буласаҡ. Музейҙы төҙөү эштәрен сентябрь айында башлап, 2015 йылдың майында тамамлау күҙаллана. Ағас архитектура музейы башҡалабыҙ Өфөнөң мәҙәни-тарихи объекттарын күргәҙмә рәүешендә тергеҙеүгә, улар менән киләсәк быуынды таныштырыуға, шулай уҡ туристарҙы йәлеп итеүгә булышлыҡ итәсәк. Сығанаҡ: «Ашҡаҙар» радиоһы