23 май Хөсәйен Әхмәтов исемендәге Башҡорт дәүләт филармонияһының Ҙур залында Рәсәйҙең атҡаҙанған, Башҡортостандың халыҡ артисы, Салауат Юлаев исемендәге дәүләт премияһы лауреаты Нәзифә Ҡадырованың юбилей бенефисы үтә. Тамашаның режиссеры – Илшат Фәхертдинов.

Нәзифә Ҡадырованың исеме республикала ғына түгел, сит илдәрҙә лә киң билдәле. Йөҙәрләгән тамашасыны әсир иткән моң эйәһенең репертуары бай йөкмәткеле: халыҡ йырҙары, романстар, эстрада әҫәрҙәре. Нәзифә Жәүит ҡыҙын айырып торған үҙенсәлек - ул тыуҙырған образ. Һәр йырҙы йөрәге аша үткәреп, тетрәндергес итеп башҡара ул. Йөрәктән сыҡҡан моң йөрәктәрга барып етә. Бына нисә йыл инде йырсы яратҡан филармонияһында ең һыҙғанып ижад итә. Әле сираттағы юбилейын да ул туған ижад йортонда яратҡан тамашасылары менән үткәрәсәк. Нәзифә Ҡадырова менән бергә моңланғығыҙ килһә, рәхим итегеҙ!

Башлана 19.00 сәғәттә.