Башҡортостан телевидениеһы һәм радиоһының тәүге дикторы Рәсимә Кәримова «Башҡортостан Республикаһы алдындағы ҡаҙаныштары өсөн» ордены менән бүләкләнде. Был туралағы Указға Республика Президенты Рөстәм Хәмитов ҡул ҡуйҙы. Ә оҙаҡ йылдар бергә эшләгән коллегаларын, үҙен яратып ҡараған тамашасыларын юбиляр Мәжит Ғафури исемендәге Башҡорт дәүләт академия драма театрына йыйҙы.

Ике телдә лә оҫта итеп тапшырыуҙар алып барған эфир йондоҙо, 30 йыл телевидениела эшләгәндән һуң радиоға күсә, заманында уның тауышын танымаған кеше булмағандыр. Байрам айҡанлы ул коллегаларына ҡотлау һүҙҙәрен еткерә.

Рәсимә Кәримованың эшмәкәрлеге Башҡортостандың һәм Рәсәйҙең атҡаҙанған мәҙәниәт хеҙмәткәре тигән маҡтаулы исем менән баһалана. Республика телевидениеһында ул «Яңылыҡтар» сығарылышын, ижтимағи-сәйәси, нәфис-әҙәби тапшырыуҙарҙы алып бара. Уның хеҙмәт юлы күптәр өсөн үрнәк булып тора.

Юбилей кисәһе тамашасылар Рәсимә Кәримованы бер ҙә онотмағанын йәнә иҫбатланы. Театрҙың ҙур залында бер буш урын да юҡ ине. Рәсимә Сәғит ҡыҙын коллегалары, дуҫтары, яҡындары һәм тоғро тамашасылары тәбрикләне, йылы ҡотлауҙарын еткерҙе.