Зәйнәб Биишева исемендәге Башҡортостан «Китап» нәшриәтендә ике юбиляр авторҙың поэмалар һәм шиғырҙар йыйынтығы донъя күрҙе.

«Ҡанатлы йөрәк» — Шәйехзада Бабич исемендәге дәүләт йәштәр премияһы лауреаты Тәнзилә Дәүләтбирҙинаның алтынсы китабы. Нескә лиризм менән һуғарылған, юғары гражданлыҡ рухында яҙылған әҫәрҙәр ихласлығы менән күңелде арбай. Үҙенсәлекле шиғриәтенең төп темалары — кеше яҙмышы, тормош асылы, ата-әсәһенә, балаларына, һөйгәненә һәм тәбиғәткә ҡарата оло мөхәббәт.

Шағирә заман һулышын һиҙгер тоя. Поэмалары ғәҙәти булмаған сюжетҡа ҡоролған. Көслө тойғоларҙан, һыҙланыуҙарҙан, уйланыуҙарҙан яралған. Милли колорит һаҡланған әҫәрҙәрҙә заманыбыҙҙың көнүҙәк проблемалары ҡуҙғатыла.

Әлфиә Әсәҙуллина — балалар һәм өлкәндәр өсөн берҙәй уңышлы ижад итеүсе шағирә. Ошо көндәрҙә ул «Хыял осошо» тип исемләнгән сираттағы китабын ҡулына алды. Бөйөк Еңеүҙең 70 йыллығына арналған был шиғри йыйынтыҡ дәһшәтле һуғыш йылдарын тасуирлаған «Хәтер китабы» поэмаһы менән асыла. Ата-бабаларыбыҙ тиңдәшһеҙ ҡаһарманлыҡ күрһәтеп, үҙ ғүмерҙәрен биреп яулаған тыныс тормошобоҙҙағы һәр күренеш авторҙы уйға һала, ҡыуандыра йә көйөндөрә, һоҡландыра йә утҡа һалып йән әрнетә...