Йыр кешегә ҡанат ҡуя, көс, йәшәүгә дәрт бирә, ҡайғылы ваҡытта ҡайғыны баҫа, һағышлының һағыштарын тарата, шатлыҡтарҙы, уй-теләктәрҙе йөрәктән-йөрәккә еткерә. Тормошон ҙур сәхнә менән бәйләмәһә лә, йырҙан айырылмаған, күңелдәгеһен йыр аша еткергән замандаштарыбыҙ бик күп. «Башҡортостан» дәүләт телерадиокомпанияһының «Юлдаш» мәғлүмәт һәм йыр-моң каналы быйыл да һәүәҫкәрҙәрҙе республика күләмендәге майҙанға алып сығыу, исемдәрен танытыу, өр-яңы исемдәр асыуҙы дауам итә. Был ижади конкурстың үзенсәлеге – үҙешмәкәр йырсыларҙың башҡарыу дәрәжәһен, артистлыҡ һәләтен күтәреү, композиторҙар һәм йыр авторҙарының эшсәнлеген пропагандалау, уларҙың ижади мөмкинлектәрен үҫтереү.

Конкурс шарттары буйынса унда 16 йәштән 60 йәшкә тиклем башҡарыусылар ҡатнаша ала. Бәйге өс этапта үтә: 

Тәүге тур 2012 йылдың 30 апреленә тиклем бара.

Икенсе тур – 1 июлдән 31 августҡа тиклем.

Өсөнсә тур – сентябрь, октябрь айҙары.

Конкурсанттар ике номинацияла ярышасаҡ.

Тәүгеһендә 16-нан 35 йәшкә тиклем, икенсеһендә 36-нан 60 йәшкә тиклем конкурсанттар ҡатнаша ала. Һәр номинацияла өсөнсө, икенсе, беренсе урын һәм Гран-при билдәләү ҡаралған. Быйылғы конкурста яңҡыҙ башҡарыусы, дуэт, трио, квартет һәм ансамблдәр үҙҙәрен һынап ҡарай аласаҡ. Фонограмма яҙҙырыу буйынса ойоштороусылар икенсе турға үткәндәргә ярҙам күрһәтә. Был уңайҙан сифатлы яҙмалар эшләү мөмкинлеге бар.

«Юлдаш йыры-2012» конкурсында ҡатнашыу өсөн өс йыр тәҡдим итергә кәрәк: башҡорт йәки татар халыҡ йыры, патриотик йыр һәм үҙегеҙ һайлаған (яратып башҡарған) йыр.

Бәйләнеш өсөн телефондар: 

251-65-79; 273-88-66; 273-40-87.

Йыр-моңға ғашиҡтарҙың барыһын да ижад бәйгеһендә көс һынашырға саҡырабыҙ. Танылыу өсөн бер ҡасан да һуң түгел!