асыҡ республика конкурсын үткәреү тураһында

ПОЛОЖЕНИЕ

Дөйөм положение:

«Юлдаш йыры - 2013» асыҡ республика конкурсы /артабан – Конкурс/ ижад менән әүҙем шөғөлләнгән, халыҡ һәм эстрада йырҙарын оҫта башҡарыусыларҙы билдәләйәсәк.

Конкурстың маҡсаты һәм бурыстары:

- үҙешмәкәр йырсыларҙың башҡарыу кимәлен күтәреү һәм уларҙың оҫталығын камиллаштырыу, яңы ижади һәләттәр асыу;

- йыр авторҙарының һәм композиторҙарҙың эшмәкәрлеген пропагандалау, талантлы йыр авторҙарын билдәләү;

- башҡарыусыларҙың һәм йыр авторҙарының ижади үҫешенә булышлыҡ итеү.

Конкурсты ойоштороусы:

- «Башҡортостан» телерадиотапшырыуҙар компанияһы дәүләт унитар преприятиеһы; «Юлдаш» мәғлүмәт һәм йыр-моң каналы.

Ойоштороусы билдәле башҡарыусыларҙан, композиторҙарҙан, йүнәлешле уҡыу йорттары уҡытыусыларынан һәм «Башҡортостан» ТРК ДУП хеҙмәткәрҙәренән торған баһалама комиссияһын раҫлай.

Ойоштороусы бүләктәр /приз/ фондын булдыра, лауреаттар ҡатнашлығында концерттар ойоштора, конкурсты мәғлүмәти яҡтан тәьмин итә.

Конкурста ҡатнашыусылар:

Конкурста Положениела күрһәтелгән ваҡытҡа тиклем ғариза биргән, Башҡортостан Республикаһынан, шулай уҡ Рәсәй Федерацияһының башҡа региондарынан, башҡорт һәм татар телдәрендә йырлаған, 16 йәштән 60 йәшкә тиклемге үҙешмәкәр башҡарыусылар, шулай уҡ ҡатнашыусылар башҡарыуында үҙ яҙмаларын тәҡдим иткән йыр авторҙары ҡатнаша ала.

Конкурсты үткәреү тәртибе һәм шарттары:

Конкурста ҡатнашырға теләүселәр Ойоштороусыға:

- раҫланған формала анкета-ғариза;

- үҙе тураһында ҡыҫҡаса мәғлүмәт (исем-шәрифтәр, тыуған көн һәм тыуған урын, белем кимәле, эшләгән йәки уҡыған урыны, йәшәгән адресы, бәйләнеш телефоны);

- өс әҫәрҙең фонограммаһын (беренсе йыр – башҡорт халыҡ йыры, икенсеһе - патриотик йыр, өсөнсөһө - конкурста ҡатнашыусы үҙе һайлаған йыр) тапшыра йәки «Юлдаш йыры» конкурсына тигән билдә менән 450076, Башҡортостан Республикаһы, Өфө ҡалаһы, Ғафури урамы, 9/1, «Юлдаш» мәғлүмәт һәм йыр-моң каналына ебәрә ала.

Бер башҡарыусынан иң күбе 4 йыр ҡабул ителә. Һәр йырҙың (халыҡ йырынан тыш)

а) шиғыр авторы,

б) көй авторы,

в) башҡарыусыһы күрһәтелергә тейеш.

Конкурсты үткәреү тәртибе:

Конкурс өс этапта үтә:

Беренсе тур – 2013 йылдың 1 февраленән 30 апрелгә тиклем,

Икенсе тур – 2013 йылдың 1 июленән 31 авгусына тиклем,

Өсөнсө тур – 2013 йылдың сентябрь-октябрь айҙары.

Еңеүселәрҙе билдәләгәндә өсөнсө, икенсе, беренсе урындар һәм Гран-при биреү ҡарала. Ойоштороусы һәм жюри үҙ номинацияларын булдырыу хоҡуғына эйә. Йыр авторҙары, йырҙы башҡарыусы ниндәй баһа алыуына ҡарамаҫтан, жюри ағзалары тарафынан айырым ҡарала һәм баһалана.

Беренсе турҙа радиотыңлаусылар СМС-хәбәрҙәр, шылтыратыуҙар, хаттар менән икенсе турға үтеүсе кандидаттарҙы билдәләй.

Икенсе турҙа рәсми жюри ябыҡ ултырышта был турға тәҡдим ителгән яҙмаларҙы тыңлай.

Өсөнсө тур - һығымталар яһау һәм еңеүселәр менән Гала-концерт. Өсөнсө турға үткән ҡатнашыусылар өсөн оҫталыҡ дәрестәре үткәрелә.

Йомғаҡлау этабына үткән йырҙарҙы һайлау критерийҙары: музыкаль йөкмәтке, әҙәби кимәл, артист оҫталығы, тәбиғи һәләт.

Конкурстың беренсе турында ҡатнашыу өсөн башҡарыусылар Ойоштороу комитетына йырҙарының яҙмаларын тәҡдим итә. Үҙ яҙмалары булмаған башҡарыусыларға, Ойоштороу Комитеты ҡарары менән, «Башҡортостан» ТРК ДУП студияһында йыр яҙҙырыу мөмкинлеге бирелә.

Конкурста ҡатнашырға ғариза биреү башҡарыусының Ойоштороусы ҡуйған шарттар менән килешеүен белдерә.

Финал турҙа тауышлы яҙма – фонограмма («фанера») ҡулланыу рөхсәт ителә. Финал концертта конкурс буйынса үткән йырҙарҙы алмаштырыу рөхсәт ителмәй.

Конкурс барышында профессиональ жюри шулай уҡ иң яҡшы композитор эшен, иң яҡшы шиғри әҫәрҙе билдәләй.

Ойоштороу комитеты менән килешелгәнсә, жюри ағзалары персональ бүләктәр булдыра һәм тапшыра ала.

Конкурс тураһында өҫтәмә мәғлүмәттәр «Юлдаш» каналы сайтында даими яңыртыла: www.uldashfm.ru.

Конкурсты йомғаҡлау:

Өсөнсө турҙа еңеүселәр «Юлдаш йыры» асыҡ республика конкурсының Лауреаттары һәм Дипломанттары исемдәрен аласаҡ. Гала-концерт Башҡортостан юлдаш телевидениеһынан күрһәтеләсәк, Гала-концерттың яҙмаһы һәм йыйынтыҡ диск донъя күрәсәк. Конкурста ҡатнашыусылар үҙҙәренең башҡарыу оҫталығын «Юлдаш» мәғлүмәт һәм йыр-моң каналында һәм БСТ телеканалында пропагандалау мөмкинлеген аласаҡ.

Сығанаҡ: «Юлдаш» мәғлүмәт һәм йыр-моң каналы.