Зинира Атнабаеваны юҡһынып…
27 апрелдә башҡорт милли сәнғәтендә яҡты эҙ ҡалдырған күренекле сәхнә оҫтаһы, Башҡортостандың һәм Рәсәйҙең халыҡ артисткаһы Зинира Атнабаеваның тыуыуына 80, арабыҙҙан китеүенә 2 йыл тулыу уңайынан Мәжит Ғафури исемендәге Башҡорт дәүләт академия драма театрында хәтер кисәһе үтә.
Зинира Ҡасим ҡыҙы данлы гитиссыларҙың сағыу бер вәкиле, бөтә ғүмерен театрға бағышлаған, төрлө характерҙағы сағыу, әһәмиәтле ролдәр башҡарған, улар араһында классик ролдәр ҙә, милли драматургиябыҙҙың иң аҫыл өлгөләренән образдар ҙа бик күп.
Хәтер кисәһендә актрисаның ижады, уйнаған ролдәре, китаптары, шәхесе хаҡында сәхнәләштәре, яҡындары хәтирәләр менән уртаҡлашасаҡ, уйнаған ролдәрен, яратҡан йырҙарын башҡарасаҡ. Кисәлә театрҙың барлыҡ ижади көстәре ҡатнаша.
Башлана 19.00 сәғәттә. Театр һөйөүсе дуҫтар, кисәгә рәхим итегеҙ! Инеү бушлай.