М. Аҡмулла исемендәге Башҡорт дәүләт педагогия университетындағы “Асыҡ ишектәр көнө” барышында башҡорт филологияһы факультеты “Урал батыр” эпосын яттан һөйләү флешмобын уҙғарҙы. 

Сәсәниә, филология фәндәре докторы Розалия Солтангәрәева етәкселегендәге Сәсәндәр мәктә­бе эпостан өҙөктәр ятлап, мәш­һүр әҫәр тураһында мәғлүмәт бирҙе. Тәнҡитсе, филология фән­дә­ре кандидаты, доцент Зәки Әли­баев Башҡортостан Башлығы Рөстәм Хәмитовҡа “Халыҡ сә­сәне” исемен ҡайтарыуҙы һорап яҙылған хатты ла уҡыны. Йәш артист Илдар Шәрипов “Каруан­һа­рай” көйөн ҡурайҙа уйнап ишет­терһә, башҡорт фило­ло­гияһы фа­культеты студенттары баш­ҡарыуында “Ҡобайыр” бейе­үе тамашасы күңеленә хуш килде. Әйткәндәй, “Урал батыр” эпосын яттан һөйләү буйынса сара Учалы һәм Йылайыр райондарында ошо көндәрҙә уҙған, шулай уҡ Белорет һәм Сибай ҡалаларында ла үткәрергә йыйыналар.

Сараның төп маҡсаты – хал­ҡы­­быҙҙың изге ҡомартҡыһын һаҡ­лау, пропагандалау, йәш бы­уынға еткереү. Форсаттан файҙаланып, башҡорт филологияһы факультеты деканы, филология фәндәре кандидаты, профессор Луиза Сәмситова уҡыу йортоноң әһәмиәтен билдәләне, ҡаҙа­ныш­тары менән таныштырҙы һәм сығарылыш класс уҡыусыларын ошонда белем алырға саҡырҙы.

Халҡыбыҙҙың мифологик эпосын яттан һөйләү флешмобы тан­танаһының һуңында, мәшһүр сә­сәниәбеҙ Розалия Солтан­гәрә­еваның отҡор һүҙҙәренә эйәреп, барыһы ла “яҡшылыҡ булһын атығыҙ” тигән киң билдәле юлдарҙы ятлап, ҡулға-ҡул тотоношоп, халыҡҡа ҡот һораны:

Ҡайт ҡотом – һорай ҡотом,

Һине көтә башҡортом!”

Сығанаҡ: "Башҡортостан" гәзите.