"Ҡарт кейәүҙәр, йәки Шомбай ҡоҙа" фольклор комедияһына рәхим итегеҙ!
Мостай Кәрим исемендәге Милли йәштәр театрының башҡорт труппаһы тиҙҙән тамашасы иғтибарына өр-яңы спектакль тәҡдим итәсәк. Флорид Бүләков әҫәре буйынса ҡуйылған "Ҡарт кейәүҙәр, йәки Шомбай ҡоҙа" тип аталған фольклор комедия театр һөйөүселәрҙе тап ошо жанрҙа көлдөрмәксе.
Комедияның ҡуйыусы-режиссеры БР-ҙың Ш. Бабич исемендәге Йәштәр премияһы лауреаты - Рөстәм Хәкимов, рәссамы - Владимир Королев, балетмейстер - Рәмизә Мөхәмәтшина, хормейстер - Афарим Аҡсурин, композитор - Ришат Сәғитов.
Шулай уҡ спектаклдә театр актерҙары - Башҡортостандың халыҡ артистары Рәмилә Сәлимгәрәева, Вәкилә Ҡалмантаева, Мәғәфүр Усманов, Башҡортостандың атҡаҙанған артистары Нәғим Нурғәлин, Венер Камалов, Альбина Кашанова, Эльмира Саматова, шулай уҡ йәш, әммә үҙҙәрен танытып өлгөргән актерҙар - Рәмзил Сәлмәнов, Гөлшат Ғайсина, Илнур Лоҡманов, Шәһит Хамматов, Лилиә Исҡужина, Радмир Абдуллин, Ләйсән Миңлеғәлиева, Аида Күлбаева, Илгиз Таһировтарҙы күрергә мөмкин.
Яуызлыҡты яҡшылыҡ менән еңеп булған кеүек, Байназар кеүек ҡомһоҙ байҙы ла урынына ултыртырға була. Шомбайҙың ни рәүешле ҡоҙа булып китеүен, уның байҙы нисек еңеүен һәм һуңынан барыһын да бәхеткә илтеүен күргегеҙ килһә, 7, 8 декабрь көндө Милли йәштәр театрына, "Ҡарт кейәүҙәр, йәки Шомбай ҡоҙа" фольклор комедияһына рәхим итегеҙ!
