Мәскәүҙә Башҡортостан делегацияһы Ҡаҙағстандың Рәсәйҙәге илсеһе Ғалым Оразбәков менән осрашты.

Осрашыу 2015 йылда Өфөлә үтәсәк ШОС һәм Брикс саммитына арналды. Сарала беҙҙең республиканы Хөкүмәт Премьер-министры урынбаҫары Салауат Сәғитов етәкләне.

Башҡортостан менән Ҡаҙағстан араһында хеҙмәттәшлек тураһындағы тәүге килешеүгә 1998-се йылда төҙөлгән. Унан һуң Астана ҡалаһында Башҡорт вәкиллеге асыла. Сауҙа-иҡтисади бәйләнештәр яйға һалына. Ҡаҙағстандан нефть, газ, ҡара һәм төҫлө металдар килтерелә, ә беҙҙең төбәк нефть химияһы сәнәғәте продукттарын, төҙөлөш материалдарын ебәрә.

Әңгәмә барышында Ҡаҙағстанда май аҙағында үтәсәк Башҡортостан көндәренә айырым иғтибар бүленде. Яҡтар күләмле саммит алдынан ошондай үҙенсәлекле сара үткәреү республикалар араһындағы бәйләнеште тағы ла нығытыр тип иҫәпләй.

Сығанаҡ: Башҡортостан юлдаш телевидениеһы