12-14 июнь Ейәнсура районында «Ҡош юлы» IV бард йыры асыҡ фестивале үтә. Уны Ейәнсура районы хакимиәте, «Шоңҡар» журналы, Өфө ҡалаһының йәштәр сәйәсәте буйынса комитеты ойоштора.

Был юлы конкурс арабыҙҙан иртә киткән шағир Ғилман Ишкининдың яҡты иҫтәлегенә арнала. Фестивалдә 25 автор-башҡарыусы ҡатнашасаҡ, уларҙың 24-ен жюри ағзалары һайлап алһа, 25-се ҡатнашыусыны интернет аша тауыш биреп тамашасы үҙе билдәләне.

«Ҡош юлы» һәүәҫкәр шағир, композитор, башҡарыусыларҙың эшмәкәрлеген әүҙемләштереү һәм оҫталыҡтарын арттырыу, башҡорт бард хәрәкәтен киңерәк йәйелдереү кеүек маҡсаттар ҡуя. Фестивалдә 16 йәштән өлкән башҡарыусылар ҡатнаша ала. Конкурстың төп шарты булып гитарала уйнап йырлау тора.

Еңеүселәрҙе «Йыл йыры», «Тамашасы һөйөүе», «Йыл асышы», «Иң яҡшы социаль йыр», «Ғилман Ишкининдың шиғырына яҙылған иң яҡшы йыр» кеүек номинацияларҙа билдәләйәсәктәр.