19 - 29 сентябрьҙә «Азияның супер-моделе – 2012» VII халыҡ-ара конкурсы уҙҙы. Телевизион шоу форматында үткән конкурс Ҡытайҙың төрлө төбәктәрендә төшөрөлә һәм уны көн һайын телевизорҙан 60 миллион тамашасы күҙәтеп бара. Азия илдәренең «иңдән-иң һылыу ҡыҙы» исеме өсөн 14 илдән 26 модель ҡатнаша. Әйткәндәй, бына ҡатнашыусы илдәр исемлеге: Вьетнам, Берләшкән Ғәрәп Әмирлектәре, Ҡытай, Корея, Һиндостан, Сингапур, Таиланд, Малайзия, Монголия, Шри-Ланка, Үзбәкстан, Рәсәй һәм… Башҡортостан!!!
Эйе-эйе, конкурс ойоштороусылары Башҡортостанды, суверенлы республика булараҡ, Рәсәй Федерацияһынан айырым рәүештә бәйгелә ҡатнашырға хоҡуҡлы тип тапҡан. Шуға күрә Башҡортостан ҡатнашыусы илдәр исемлегендә 1-се һан аҫтында тора, ә беҙҙең «Һылыуҡай»ҙарыбыҙ Айһылыу Юнусбаева (ӨДНТУ 3 курс. Буйы 177см., 87-59-91), Айһылыу Фатыхова (БДУ 5 курс. Буйы 172 см., 85-58-89) 1-се һәм 2-се һан аҫтында сығыш яһай.
Яҡташтарыбыҙ милли үҙенсәлектәре, саялыҡтары менән жюри ағзаларын һәм халыҡты таң ҡалдырып «Азияның иң яҡшы ун супер-моделе» исемлегенә инде. Ә Айһылыу Юнусбаева интерактив тауыш биреү һөҙөмтәләре буйынса «Тамашасы һөйөүе»н яуланы. Улар икеһе лә Линара Таһированың «Һылыукай – Bashkirian Beauty» студияһынан икәнлеген дә әйтеп китергә кәрәктер. Сығанаҡ: «Шоңҡар» журналы