Рәсәй һәм Ҡытай илдәре араһындағы дуҫлыҡтың нығыныуын күрһәткән миҫалдар Башҡортостанға ла килеп етте. Ошо көндәрҙә З. Исмәғилев исемендәге Өфө дәүләт сәнғәт академияһы Ҡытайҙан, Дзансю провинцияһы ҡунаҡтарын-музыка колледжы уҡытыусылары һәм уҡыусыларын ҡабул итте. Ҡытай ҡунаҡтары ӨДСА, уның тарихы, бөгөнгөһө, эшмәкәрлеге менән ҡыҙыҡһына һәм тығыҙ бәйләнеш булдырырға теләй. Ҡунаҡтарҙы ижади эшмәкәрлек буйынса ректор урынбаҫары Олег Мельников һәм махсус фортепиано кафедраһы мөдире Рөстәм Шәйхетдинов ҡаршыланы. Сәфәр сиктәрендә Ҡытай уҡытыусы һәм уҡыусыларына асыҡ дәрестәр, Башҡортостан Йәштәр симфоник оркестрының репетицияһы күрһәтелде, академия буйлап экскурсия ойошторолдо. Аҙаҡ, уларға ӨДСА махсус фортепиано кафедраһы студенттары ҡунаҡтар хөрмәтенә концерт ҡуйҙы.