29 ноябрҙә “Ҡыҙыҡ менән Мәҙәк” эстрада төркөмө яңы юмористик программаһы менән таныштырасаҡ. Төркөм етәксеһе, Башҡортостандың халыҡ артисы Вәлит Илембәтов хәбәр итеүенсә, программаның төп комик персонаждары Ҡыҙыҡ Ҡотләхмәт улы менән Мәҙәк тамашасыларға өр-яңы һәм иң көлкөлө инсценировкаларын, скетч һәм шаяртыуҙарын тәҡдим итәсәк.

— Беҙҙең яңы проект хәҙерге заман кешеһе тормошонан – дауаханала, мәктәптә, юлда һәм башҡа урындарҙа осрауы бик ихтимал булған көлкөлө хәлдәрҙе күрһәтә, — ти Вәлит Хәлит улы. – Уларҙың һәр береһе туранан-тура беҙгә ҡағыла, шуға ла бик актуаль.

“Ҡыҙыҡ менән Мәҙәк” төркөмөнөң яңы программаһы менән танышыу өсөн 29 ноябрҙә киске 19.00 сәғәттә Хөсәйен Әхмәтов исемендәге Башҡорт дәүләт филармонияһының Ҙур залына рәхим итегеҙ! Унда артистар Вәлит Илембәтов, Хәмит Теләмов, Ғәлиә Моратова, Искәндәр Ғәзизов, Зөлфиә Әхмәтова, Фаяз Йәнтурин, Ольга Хәйруллина һәм башҡалар ҡатнаша.