Мәжит Ғафури исемендәге Башҡорт дәүләт драма театрында актер Арыҫлан Йәнбәковтың хәтер кисәһе уҙҙы.

Арабыҙҙан йәшләй киткән талантлы актер һәм режиссер Арыҫлан Йәнбәков үҙе лә, ижады ла йәш һәм сағыу ине. Сарала башҡорт милли сәнғәтен үҫтереүгә үҙ өлөшөн индереп өлгөргән актерҙың исемен мәңгеләштереү маҡсатында донъя күргән «Хазина» тип исемләнгән дисктың исем туйы ла үтте.

Мостай Кәрим һүҙҙәренә Юлай Үҙәнбаев ижад иткән был йырҙы тамашасы тиҙ арала яратып өлгөрә. Арыҫлан Йәнбәков башҡарыуындағы йыр әле булһа ҡолаҡ төбөндә яңғырап торғандай.

Моң һөйөүселәр уны бынан тыш, «Гәрәбә», «Гармуным, уйна һин», «Һаҡмар һылыуы», кеүек йырҙар аша ла танып белә.

«Ҡурай» йыр-моң телеканалы һәм яҡын дуҫтары Арыҫлан Йәнбәковтың исемен мәңгеләштереү маҡсатында диск сығарҙы. Дискҡа Арыҫландың танылған һәм тамашасыға ишетелеп өлгөрмәгән йырҙары тупланған. Альбомдың исем туйынан һуң йыйылыусыларға Арыҫлан Йәнбәков сәхнәләштергән Салауат Әбүзәровтың «Хыялый» лирик комедияһы күрһәтелде.

Арыҫлан Мәскәүҙең Щукин исемендәге институтын тамамлап режиссура өлкәһендә уңышлы хеҙмәт итергә хыялланған була. Сәхнәгә дүрт әҫәр сығарып өлгөрә. Әммә, ҡыҙғанысҡа ҡаршы, ижадсының уй-ниәттәренең барыһына ла тормошҡа ашыу бәхете насип булмай.