Туймазы районында тәгәрмәсле китапхана эшләй башланы. Быға бәйле төбәк ауылдары китап, гәзит-журналдар уҡыу мөмкинлегенә эйә булды.

Китаптарҙы күсереп йөрөтөү идеяһы күптән тыуа. Әммә уйҙы тормошҡа ашырыу өсөн күп көс һәм ваҡыт талап ителә. Ниһайәт, республиканың Мәҙәниәт министрлығы менән район хакимиәте финанслаған проект нигеҙендә ауыл халҡына күсмә китапхана бүләк ителә. Был ҙур мөмкинлек, сөнки 113 ауыл иҫәпләнгән райондың яртыһында бөтөнләй китапхана юҡ тиерлек. Китапхана урынлашҡан автобус эсендә ниндәй генә әҙәбиәт юҡ. Энциклопедия, детектив, милли әҙәбиәт, барлығы 2 мең берәмек китап.

Күҙҙәре насар күреүселәр өсөн автобуста тифломаг-телмәр плееры урынлаштырылған. Был категорияға ҡараған уҡыусылар, флеш-картаға индерелгән әҫәрҙәрҙе тыңлай ала. Бынан тыш, китапханала балалар ҙа үҙҙәре өсөн фәһемле һәм ҡыҙыҡлы китап таба ала.

Әйткәндәй, китапхана ауылдаштарҙы заманса хеҙмәт менән дә тәьмин итә. Балаларға йәнһүрәттәр күрһәтелһә, өлкәндәр интернет менән ҡуллана ала. Китапхана тәүгеләрҙән булып Егетәк ауылы халҡын хеҙмәтләндерҙе.

Ойоштороусылар әйтеүенсә, китапхана ауылдарға киләсәктә лә йөрөйәсәк. Тимәк, әҙәбиәт һөйөүселәр китаптан айырылмаясаҡ.