Әхмәтзәки Вәлиди исемендәге Милли китапханала Бөйөк Еңеүҙең 69 йыллығына арналған әҙәби-музыкаль кисә үтте. Фатима Мостафина исемендәге 20-се һәм Дим биҫтәһенең 102-се гимназия уҡыусылары менән осрашыуға күренекле шағирҙарыбыҙ – Әнисә Таһирова, Ҡәҙим Аралбаев һәм Ирек Кинйәбулатов килде.

Әҙиптәребеҙ өсөһө лә һуғыш быуыны балалары. Беҙ ишетеп кенә белгән ауырлыҡтарҙы улар үҙ иңдәрендә татығандар, етемлектең, аслыҡтың әсе ғазаптарын кисергәндәр. Был кисәлә улар уҡыусылар менән үҙҙәренең бала саҡ хәтирәләре менән уртаҡлаштылар, ҡәһәрле һуғышҡа арнап яҙған тетрәндергес шиғырҙарын уҡынылар.

Башҡортостандың халыҡ шағиры Ҡәҙим Аралбаев:

- 9 май – моңһоу байрам, сөнки был еңеү бик күп ҡорбандар аша килде. Күпме балалар етем, атайһыҙ үҫте, күпме сәскә кеүек ҡатындар тол ҡалды. Беҙ – һуғыш балалары – ул йылдарҙа күргән ауырлыҡтар бер ни тиклем кимәлдә беҙҙең ижадыбыҙҙа ла сағыла, - тине.

Шағирә Әнисә Таһирова Бөйөк Еңеүҙе инҡар иткән, тарихи дөрөҫлөктө үҙгәртергә тырышыусылар булыуына әсенеүен белдерҙе. Һеҙ – беҙҙең киләсәк, күңелегеҙҙә яҡшы уйҙар йөрөтөгөҙ, хеҙмәтте яратығыҙ, тип өндәште ул йәш уҡыусыларға.

Яратҡан шағирыбыҙ Ирек Кинйәбулатов май яғып печенье ашар өсөн генә дуҫы менән нисек итеп балалар йортона эләгергә «тырышыуын» һөйләп күңелдәрҙе күтәрҙе. Был ҡыҙыҡлы тарих берәүҙе лә битараф ҡалдырманы.

Сараны Өфө сәнғәт училищеһы студенттары – Урал Мәҡсүтов, Айтуған Ғәйзуллин, Гөлназ Зарипова, Айгөл Әхмәтшина һәм Эльвина Мөхәмәтгәрәева башҡарыуында йыр-моңдар биҙәне.

Һеҙ – бәхетле быуын, тине шағирҙарыбыҙ. Ысынлап та, был һүҙҙәрҙә тәрән хаҡлыҡ ята. Тормоштоң йәмен-тәмен тойоп йәшәйек, дуҫтар. Осрашыуға йыйылыусылар күгебеҙ аяҙ булһын, һәр саҡ ҡояш яҡтыртһын, тигән теләктәр менән таралышты.