ХХ быуаттың иң ҙур фажиғәһе – Бөйөк Ватан һуғышы (1941–1945 й.й.) тамамланыуға 70 йыл ваҡыт үтте. 4 йыл эсендә был һуғыш миллионлаған кешене ҡорбан итте, күпме ҡыйралған яҙмыштар, күпме тарих – һанап бөткөһөҙ! Ҡыҙғанысҡа ҡаршы, һуғыш ветерандары йылдан-йыл аҙая, яуҙа ҡатнашҡан шаһиттар беҙҙең аранан китә бара. Әммә улар яулаған Бөйөк Еңеү тере тарих булып, яҡты киләсәгебеҙ хаҡына беҙҙең йөрәктәрҙә мәңге һаҡлана. 

«Һуғыш хаҡында 70 сюжет» сәнғәт күргәҙмәһендә һуғыш темаһына театрҙа төрлө йылдарҙа ҡуйылған спектаклдәрҙән фоторәсемдәр урын алған: «Әсәләр көтәләр улдарын», «Яралы яҙмыш», «Рядовойҙар», «Муса Йәлил», «Ул ҡайтты». Шулай уҡ Өфө сәнғәт училищеһы йәш рәссамдарының художество эштәре лә ҡуйылған: «Блокадницалар», «Ветеран», «Санитарка» һ.б. Һәр рамда – бер тарих, уларҙың һәр береһенә ҡарап беҙ тыныс тормоштоң ниндәй ҡорбандар аша яуланғанын тағы бер тапҡыр күҙ алдынан үткәрәбеҙ. Геройҙарға мәңгелек дан! Еңеүгә дан!