27 мартта Һуҡырҙар өсөн башҡорт республика махсус китапханаһында Рәсәйҙең һәм Башҡортостандың атҡаҙанған сәнғәт эшмәкәре Салауат Низаметдинов менән осрашыу үтте. Был сара композиторҙың 55 йәшлек юбилейына һәм 30 йыллыҡ ижадына арналды.

Тамаша өсөн был китапхана осраҡлы һайланмаған, Салауат Әхмәҙи улы уның даими ҡунағы. 2004 йылда махсус китапхана беренсе тапҡыр композиторҙың ижады тураһында «һөйләшеүсе» китап сығара. 

Сараға китапхана уҡыусылары, Салауат Низаметдиновтың ижадын һөйөүселәр, Өфө китапхана колледжы студенттары килгән ине.

Композиторҙың юбилейына бәйле март-апрель айҙарында бик күп концерттар, осрашыу кисәләре үтә, 5 апрелдә Өфө сәнғәт училищеһында симфоник концерт, 12 апрелдә Башҡорт дәүләт филармонияһында хор музыкаһы концерты планлаштырылған.