Баҫмала билдәле рус яҙыусыларының балалар өсөн ижад иткән проза әҫәрҙәре башҡортсаға тәржемә ителгән. Унда кескәйҙәр яратып уҡырлыҡ Валентина Осеева, Виталий Бианки, Михаил Пришвин, Николай Сладков, Георгий Скребицкий кеуек авторҙарҙың хикәйәләре һайланған. Рус телендә быға саҡлы таныш әҫәрҙәрҙе башҡортса уҡыу балаларҙың белемен арттырыр, фекер йөрөтөүҙе камиллаштырыр, һөйләү телмәрен үҫтерер, рус әҙәбиәтен яҡшыраҡ аңларға, уны яратырға ярҙам итер. Бер үк әҫәрҙе сағыштырмаса ике телдә уҡыу рус һәм башҡорт әҙәби телдәренең байлығын, матурлығын һәм уларҙың һәр береһенә генә хас үҙенсәлектәрен аңларға, тел белемен үҫтереүгә мөмкинлек бирәсәк.

Китаптың аҙағында ҡайһы бер һүҙҙәрҙең, бигерәк тә йәнлектәр (хайуандар, ҡоштар, бөжәктәр) исемдәренең, башҡортсанан руссаға тәржемә һүҙлеге бирелгән.

Әҫәрҙәрҙең тәржемәсеһе билдәләүенсә, китаптың әһәмиәте башҡорт балалары өсөн генә түгел, башҡорт телен өйрәнеүсе рус теле уҡыусылар өсөн дә ҙур буласаҡ. 

Сығанаҡ: нәшриәт сайтынан алынды.