Бөгөн, 5 июлдә, Әхмәт-Зәки Вәлиди исемендәге Милли китапхананың ҙур күргәҙмә залында «Баш ҡала финанс-гуманитар академияһы» дизайн кафедраһы һәм Өфө дәүләт нефть техник университетының архитектура кафедраһы сығарылыш курс студенттарының диплом эштәре күргәҙмәһе буласаҡ.
Күргәҙмәлә 38 сағыу эш менән танышырға мөмкин. Йәштәрҙең диплом эштәре, аңлауығыҙса, киләсәктә баш ҡаланы биҙәргә тейеш «Башҡорт ауылы» исемле сауҙа-күңел асыу комплексының дизайн-проектына арнала.
Йәш дизайнерҙар үҙ эсенә минимализм, сюрреализм һыҙаттарын алған заманса фатирҙарҙың яңы проекттарын да тәҡдим итмәксе. Эштәр араһында шулай уҡ ҡала сите өсөн ҡаралған «Скандинав әкиәте», «Суоми илендә» кеүек өй проекттары ла буласаҡ. Әйткәндәй, студенттар тарафынан «С.Т. Аксаков йорт-музейы» тарихи-мемориаль комплексындағы кабинеттың дизайн-проекты махсус премияға лайыҡ булған ине.
Күргәҙмә ваҡытында, теләүселәр булһа, интерьер дизайны буйынса белгестәр менән аралашырға, файҙалы кәңәштәр алырға мөмкин буласаҡ. Ә күргәҙмә иһә үҙ эшен 16:00 сәғәттә башлай. Сығанаҡ: «Шоңҡар» журналы