Һуңғы ваҡытта илебеҙҙә рухиәткә иғтибарҙың артыуы – йән ҡыуа­нысы. Нимә генә тиһәк тә, кешенең, йәмғиәттең, тотош дәүләттең ҡаҡшауы нәҡ шуның бүҫкәреүенә бәйле. Рухиәт – йәшәйеш имәненең үҙәге ул. Былтыр илебеҙ Мәҙәниәт йылы менән шаулап йәшәһә, быйыл иһә Әҙәбиәт йылын ҡыуанып ҡаршыланы.

Республикабыҙҙа Әҙәбиәт йылы рәсми рәүештә “Башҡортостан” дәү­ләт концерт залында башланды. 

– Беҙ йәш быуында әҙәби китап­тарға ҡарата ҡыҙыҡһыныу уятырға тейешбеҙ, – тине Баш­ҡортостан Республикаһы Хөкүмәте­нең Премь­ер-министры урынбаҫары Салауат Сә­ғитов, тантанаға йы­йылған ха­лыҡты тәбрикләп. – Заман талабына яуап биргән аудио-китап, интернет-китап кеүек алымдарҙы фай­ҙа­ланырға кәрәк. Әҙәбиәте­беҙҙең иң яҡшы өлгөләре менән сит ил уҡыусылары ла танышһын. Әлбиттә, туған телде һаҡлау төп мәсьәлә булып ҡала. Рәсәй Федерацияһының дәүләт теле булараҡ, урыҫ телен төплө белеүҙе тәьмин итергә, шул уҡ ваҡытта башҡорт телен һаҡларға һәм үҫтерергә лә бурыслыбыҙ.

Гәзит уҡыусылар Әҙәбиәт йылы­ның эмблемаһы менән күптән таныш инде. Тантана барышында уның авторы Игорь Тонконоговҡа еңеүсе сертификаты тапшырылды.

Халыҡ күңелендә яҡты бер нур булып ҡалған былтырғы Мәҙәниәт йылы штандартының райондар буйлап сәйәхәтен йылы тойғолар менән хәтергә алабыҙ. Был йола быйыл да дауам итәсәк – “Әҙәби нағыш” тип аталған республика марафоны сә­фәр­гә юлланды. Мәҙәниәт министры Әминә Шафиҡова марафондың символын – Әҙәбиәт йылының йылъяҙ­маһына әүереләсәк ҙур китапты – тәүгеләрҙән булып Ҡырмыҫҡалы райо­ны хакимиәте башлығы Фәнзил Сыңғыҙовҡа тапшырҙы. Был китап Башҡортостандың бар тарафтарын урап сығасаҡ.

Хәтерегеҙҙәлер, марафонды бе­рен­селәрҙән булып Башҡорт­остан­дың тәүге халыҡ шағиры Мәжит Ғафуриҙың тыуған төйәге – Ғафури районы ҡабул итергә тейеш ине. Был хаҡта беҙ ҙә гәзиттә яҙып сыҡ­ҡайныҡ. Үкенескә ҡаршы, ниндәйҙер сәбәп арҡаһында район Әҙәбиәт йылының марафонын беренсе булып ҡабул итергә был район хакимиәте башлығы килмәгән... 

– Марафондың төп маҡсаты – һәләтле йәштәрҙе табыу һәм үҫ­тереү. Күптәр яҙыша бөгөн, ләкин өмөт уятҡандары күренмәй. Беҙ тәжрибә мәктәптәре ойоштороп, улар­ҙы оҫталыҡ серҙәренә тө­шөндөрөргә, алмаш әҙерләргә те­йешбеҙ, – тине Башҡортостан Яҙыусылар союзы идараһы рәйесе Наил Ғәйетбаев. – Республикабыҙ төбәктәрендә Зәйнәб Биишева исемендәге “Китап” нәшриә­тенең магазиндары асыласаҡ. Шулай уҡ мохтаж яҙыусыларға фатир һәм ер бүлеп биреү, китаптарын нәшер итеү буйынса эштәр башҡарыласаҡ.

Башҡортостандың халыҡ шағиры Рауил Бикбаев “Башҡортостан бында башлана” тигән шиғырын уҡып, кисәгә йәм өҫтәп ебәрҙе. Йөрәктәргә үтеп ингән шиғри һүҙҙәр Әҙәбиәт йылына фатиха булып яңғырағандай булды. 

Тантана сәнғәт оҫталарының концерты, республикабыҙҙа үткән төрлө конкурстарҙа еңеүселәрҙең сығышы менән тамамланды.

Автор: Салауат Әбүзәров.

Сығанаҡ: "Башҡортостан" гәзите.