Төҙөкләндереү эштәрен киләһе йыл башлау күҙаллана. Был турала «Росгосцирк» компанияһының генераль директоры Вадим Гаглоев республика етәксеһе менән осрашыуҙа белдерҙе.

Ремонт эштәренән Башҡортостан да ситтә ҡалмаясаҡ. Рөстәм Хәмитов сығымдарҙың бер өлөшөн республика ҡапларға әҙер, тип белдерҙе. Өфө циркы халыҡ күпләп һәм яратып йөрөгән урындарҙың береһе. Заманса шарттар тыуҙырылғандан һуң бында төрлө концерт-тамашалар ҙа ойоштороп буласаҡ.

Өфө дәүләт цирк 1968-се йылдың көҙөнән эшләп килә. Ул илдең иң яҡшы биш циркы исемлегенә инә. Бинаның ҙур аренаһы, 2 меңгә яҡын тамашасыға иҫәпләнгән залы, артистар, йәнлек-хайуандар өсөн бүлмәләре бар. Әммә бөгөн Өфө циркы заман талаптарына яуап бирә тип әйтеп булмай, Объектта 2-3 тиҫтә йыл тирәһе капиталь ремонт яһалғаны юҡ.

Вадим Гаглоев, «Росгосцирк» компанияһының генераль директоры: «Төҙөкләндереү эштәрен киләһе йыл башларға ниәтләйбеҙ. Ремонтҡа яҡынса 350 миллион һум тирәһе аҡса талап ителә, теүәл сумма проект әҙерләнгән һуң билдәле буласаҡ. Республика етәксеһенең цирк яҙмышына битараф булмауы һәм ремонт эштәрен финанслауҙа ҡатнашырға теләүе бик ҡыуаныслы. Бындай күләмле эште беҙҙең компания яңғыҙы ғына атҡарып сыға алмаҫ ине».