Өфө дәүләт циркында бөтә Ер шарын урап сыҡҡан Мәскәү циркы тамашалары башланды. Егерме биш кешенән торған труппа баш ҡалаға бер нисә көн элек килде. Аҡ айыуҙар тамашаһын тәүгеләрҙән булып тулы булмаған ғаиләлә тәрбиәләнеүселәр һәм мөмкинлектәре сикләнгән балалар ҡараны. Сабыйҙарға йөҙләп билет бушлай бирелде. 

Һәр сығыш юғары әҙерлек һәм ныҡышмал эш талап итә, тип билдәләй артистар. Сөнки йәнлектәр өйрәтелгән булһа ла, тик торғанда көтөлмәгән аҙым яһауы ихтимал. Тамашаларҙың тағы бер үҙенсәлеге бар: программала ҡатнашыусылар боҙ өҫтөндә сығыш яһай. Аҡ айыуҙар ҡатмарлы акробатик трюктар башҡара.

Цирк һөйөүселәрҙең күңеленә бигерәк тә бесәй, күгәрсен, айыу кеүек йәнлектәрҙең сығыштары хуш килде. Улар фекеренсә, йәнлектәрҙән дә тоғро һәм эскерһеҙ йән эйәләре юҡ. Мәскәү циркы биш йылдан ашыу эшләү дәүерендә тотош Ер шарын урап сыҡҡан.