Коллектив театр һөйөүселәр иғтибарына Шәриф Камалдың «Хажи әфәнде өйләнә» комедияһын тәҡдим итте. 1915 йылда тәүбашлап сәхнәләштерелгән әҫәр кире сәхнәгә әйләнеп ҡайтты.
Пьеса классик фонд өлгөһө. Ул Совет власы осоронда күп кенә театрҙарҙың репертуарында лайыҡлы урын биләй. Спектаклдең ҡуйыусы режиссеры Илдар Вәлиев заманса алымдар ҡулланып, бөгөнгө тормош менән бәйләп, музыкаль комедия жанрына мөрәжәғәт итә. Төп ролде ул үҙе башҡара.
Спектаклдә һәр кем үҙ файҙаһы өсөн көрәшә. Кеше иҫәбенә кеҫә ҡалынайтыу, мал артынан ҡыуып, аҙғын юлға баҫыу... тамашасыны тетрәткән кисерештәр ошо. Ижади коллектив та айырым бер тулҡынланыу кисерә.
Театр коллективы 21 ижад миҙгеленә яңы көс һәм өмөт менән аяҡ баҫты. Тамашасылар ҙа актерҙарҙан береһенән-береһе ҡыҙыҡлыраҡ һәм фәһемлерәк спектаклдәр көтә. Сығанаҡ: Башҡортостан юлдаш телевидениеһы