Зәйнәб Биишева исемендәге Башҡортостан «Китап» нәшриәтендә Башҡортостандың аткаҙанған мәҙәниәт һәм аткаҙанған мәғариф хеҙмәткәре, билдәле яҙыусы һәм драматург Айһылыу Йәғәфәрованың «Дала ҡыҙы» тигән китабы сыҡты.

Әҙибәнең был йыйынтығы ике пьеса менән бер повестан ғибәрәт. Тәүге пьесала 1812 йылғы Ватан һуғышында Рәсәйҙе француз баҫҡынсыларынан азат итешеүсе башҡорт яугирҙары тураһында һүҙ барһа, икенсеһендә автор йәнтөйәк яҙмышы хаҡында уйлана. 

“Эйәрҙә ҡалды батыр” повесында яҙыусы башҡорт халҡының аҡылы, тәрбиә ҡанундары, сағыу мәҙәниәте хаҡында фекер йөрөтә. 

Ошо көндәрҙә Иҙел Хәлимов “Яҙмыш йөгө” шиғри йыйынтығын ҡулына алды. Авторҙың был сираттағы китабына йәшәү мәғәнәһе, мөхәббәт, тыуған ер тураһында поэтик әҫәрҙәре һәм йыр текстары тупланды.

Китаптар башҡорт телендә нәшер ителгән һәм киң уҡыусылар даирәһе өсөн тәғәйенләнгән. «Китап» нәшриәтенең фирма магазиндарында һатып алырға йәки почта аша заказ биреп алдыртырға мөмкин.