Бар ғүмерен ошо һөнәргә арнаған актерҙар төрлө образдар роленә инеп йәшәй һәм ижад итә. Бөгөн Өфө «Нур» татар дәүләт театры ниндәй маҡсат менән йәшәй?

Өфө «Нур» татар дәүләт театры тамашасыларҙы әленән-әле яңы тамашалары менән ҡыуандыра. Режиссер Гүзәл Аҡбирҙина сәхнәләштергән сираттағы концерт һәр кемдең күңелен арбаны. Бында ижад итеүсе һәр артист актер оҫталығына ғына түгел, йыр-бейеүгә лә маһир. Коллективта һәр һәләт оҫта файҙаланыла. Шуға күрә йырлы-моң донъяһына сәйәхәт изге йолаға әйләнгән. Әммә ләкин театр сәхнәһендә башҡорт, татар классиктары әҫәрҙәре төп урынды биләй.

«Нур» театрының даны иң йәш коллективтарҙың береһе булыуға ҡарамаҫтан, ҡабатланмаҫ йөҙө һәм йүнәлеше булған театр булараҡ сит тарафтарға ла киң танылған. Һәр спектакль, премьера ҙур аншлаг менән үтә. Театр йәш көстәр менән дә тулылана. Былтыр ғына коллективҡа Заһир Исмәғилев исемендәге Өфө дәүләт сәнғәт академияһын тамамлаған бер төркөм йәштәр килгән. Тамашасылар фекеренсә, бында камиллашыр өсөн бар шарттар тыуҙырылған, сәхнә оҫталары ла етерлек. Күренекле актерҙар Сәүиә Сираева, Марат Исхаҡов оҫталыҡ серҙәре менән бүлешергә һәр саҡ әҙер.

Сығанаҡ: Башҡортостан юлдаш телевидениеһы