Граждандар һуғышы һәм тиҫтәләгән көләмәстәр геройы Чапаевҡа 125 йыл. Ошо айҡанлы кисә Өфө районының Ҡыҙыл Яр ауылы музейында хәтер кисәһе үтте.
Өфө эргәһендә барған ҡаты алышта Василий Чапаев үҙен халыҡ батыры итеп таныта. Ә һуғыш алдынан батыр нәҡ ошо бүлмәлә план ҡора.
Граждандар һуғышының легендар командиры, халыҡ геройы Василий Иванович Чапаевтың шәхесе, үҙе һәләк булғандан һуң тиҫтәләгән йылдар үтһә лә, элекке Советтар Союзында популярлығын юғалтманы.
25 Чапаев дивизияһы ил алдында күрһәткән ҡаһарманлығы менән данлыҡлы. Батыр Өфө эргәһендә барған оҙайлы алышта еңеү яулауы менән билдәле. Яуҙан һуң дошман ҡабат баш күтәрә алмай.
Чапаев халыҡ теленән төшмәй, тарихта, әҙәбиәттә лайыҡлы урын биләй. Мәктәп уҡыусылары 25 дивизияны етәкләүсе командирға арнап яҙылған йырҙы башҡарҙы.
Күрһәткән ҡаһарманлығы өсөн Василий Чапаев «Ҡыҙыл байраҡ», «Изге Георгий» ордендары һәм «Георгий» миҙалы менән бүләкләнә. Ә исеме мәңгелеккә халыҡ хәтеренә уйыла.
«Башҡортостандың мәҙәни донъяһы» порталы