25 декабрь Шаляпин исемендәге Концерт залында билдәле опера йырсыһы, Метрополитен-опера һәм Мариин театры солисы, «Грэмми» премияһы лауреаты, Башҡортостандың һәм Татарстандың халыҡ артисы Илдар Абдразаҡов менән ижади осрашыу үтәсәк.

Сарала Өфө дәүләт сәнғәт академияһы уҡытыусылары һәм студенттары ҡатнашасаҡ. Осрашыу сиктәрендә академияның вокал бүлегендә уҡыусылар өсөн оҫталыҡ дәрестәре үтәсәк. Башлана 12.20 сәғәттә. Әле Концерт залында ремонт эштәре башҡарылыу сәбәпле, Совет майҙаны яғынан кереү һорала.

Яҡташыбыҙ баш ҡалала ҙур концерттар менән дә сығыш яһай. 28 декабрь «Башҡортостан» Дәүләт концерт залында итальян йырсыһы Барбара Фриттоли менән берлектә ҙур тамаша көтөлһә, 29 декабрь донъя йондоҙҙары Башҡорт дәүләт опера һәм балет театрының Ҙур залы асылыу айҡанлы ойошторолған концертта сығыш яһаясаҡтар.