Ғабдулла Туҡайҙың "Шүрәле" поэмаһынан өҙөк. Уны белмәгән кеше юҡтыр. 1907 йылда ижад ителгән шиғри әҫәр күптән мәктәп программаһында уҡытыла килә.

Һәр кем шүрәле образын үҙенсә күрә. Өфө һынлы сәнғәт галереяһының өс күргәҙмә залында уларҙың һаны 150 етә. Бында Өфө, Нефтекама, Мәскәү, Яр Саллы ҡалаларының профессиональ рәссамдары әҫәрҙәре менән бер рәттән мәктәп уҡыусыларының да эштәре урын алған.

Туҡай шиғырҙары сараға биҙәк өҫтәне. Һәр кем нәфис һүҙ аша әйтер һүҙен, фекерен еткерҙе. Шүрәле образын төшөрөүсе балалар картиналарында уны берсә яуыз, берсә хәйләкәр итеп күргән.

Ғабдулла Туҡайҙың исемен мәңгелләштереү маҡсатында Башҡортостанда ғына түгел, башҡа төбәктәрҙә лә маҡсатлы саралар ойошторола. Өфөлә уның исемен йөрөткән урам булһа, Ҡазанда филармония, майҙан бар, шулай уҡ сәнғәт әһелдәренә тапшырылған премияны атарға мөмкин. "Шүрәле һәм мин" күргәҙмәһе лә ошо йүнәлештең бер сағылышы.