Быйыл Башҡортостанда ике тапҡыр Советтар Союзы геройы Муса Гәрәевтың тыуыуына 90 йыл тула. Был датаға арнап, Республикала һәм геройҙың тыуған яғы Илеш районында төрлө саралар уҙғарыласаҡ. Апрелдә Өфөнө «Нефтсе» мәҙәниәт һарайында ла Еңеү көнөнә һәм Муса Гәрәевтың ҡаһарманлығына арналған акция үтәсәк. Унда ике тапҡыр Ҡыҙыл байраҡ орденына лайыҡ булған А.В. Александров исемендәге йыр һәм бейеү ансамбленең сығышы көтөлә. Ансамбль Рәсәйҙең иң ҙур хәрби коллективтарының береһе. Үҙенең 83 йыл эшләү дәүерендә ул Өфөлә бер тапҡыр ғына сығыш яһаған.