29 апрелдә Өфөнөң «Нефтсе» мәҙәниәт һарайында ике тапҡыр Ҡыҙыл байраҡ орденына лайыҡ булған А.В. Александров исемендәге йыр һәм бейеү ансамбленең концерты үтте.

Өфөләләр һәм төрлө райондарҙан килгән ҡунаҡтар, ветерандар Рәсәйҙең төп һәм иң ҙур хәрби ансамбле һыналған коллективтың сағыу сығыштарын ҡарап кинәнде.

Был концерт Еңеү көнө алдынан Башҡортостанда — «Георгий таҫмаһы» һәм «1941-1945 иҫләйбеҙ!» акциялары сиктәрендә үтте. «Георгий таҫмаһы» акцияһы республикала 2005 йылдан үткәрелһә, «1941-1945 иҫләйбеҙ!» акцияһын үткәреү идеяһы «Башҡортостандың мәҙәни донъяһы» интернет-порталы менән тәҡдим ителгәйне.

Ансамбль Рәсәйҙең иң ҙур хәрби коллективтарының береһе. Үҙенең 83 йыл эшләү дәүерендә ул Өфөлә бер тапҡыр ғына сығыш яһаған.

Коллектив башҡарыуында тамашасылар «Священная война», «В землянке», «Жди солдата», «Выйду на улицу», «Камаринская», «Смуглянка», «Распрягайте, хлопцы, коней», «День Победы», йырҙарын тыңланы, «Казачья кавалерийская», «Палехская шкатулка», «Радецкий марш» бейеүҙәрен ҡараны.