11 декабрҙә Өфөлә танылған рәссам, һынлы сәнғәт академигы, РСФСР-ҙың атҡаҙанған сәнғәт эшмәкәре, Башҡорт дәүләт художество музейына нигеҙ һалыусы Михаил Нестеровҡа һәйкәл асыу тантанаһы була. Сара Евразия гуманистик форумы сиктәрендә уҙа. Тантана иртәнге сәғәт 11-ҙә башлана.

Һәйкәл М.В.Нестеров исемендәге Башҡорт дәүләт художество музейы биләмәһендә ҡуйылған. Уны Рәсәйҙең һәм Башҡортостандың атҡаҙанған рәссамы Николай Калинушкиндың (1948-2004) эскизы буйынса Башҡортостандың атҡаҙанған рәссамы Фирдант Нуриәхмәтов етәкселегендәге ижади төркөм эшләгән. Бронза һәйкәлдең бейеклеге — 3,6 метр.

Башҡорт дәүләт художество музейында 12 меңдән ашыу экспонат, шул иҫәптән Михаил Нестеров әҫәрҙәренән тупланған ҙур коллекция бар. 1954 йылдан алып музей үҙенә нигеҙ һалыусының исемен йөрөтә.


"Башинформ"