3-сө класс уҡыусыһы Алһыу Әхмәрова «Славянские братушки» тип аталған конкурста «Йәш прозаиктар» номинацияһында гран приға лайыҡ булды. «Башҡортостан — Болгария» дуҫлыҡ йәмғиәте хәбәр итеүенсә, был конкурс Рәсәйҙәге үткән Болгария көндәрен тамамланы. Рәсәйҙә Болгария көндәрен үткәреүҙе 21-се лицей уҡытыусылары ойошторған.
Конкурста Башҡортостан райондарынан һәм ҡалаларынан күп кенә уҡыусылар ҡатнашты. Шулай уҡ был конкурсҡа Һамар, Кемерова өлкәһенән һәм күрше Татарстандан да ҡатнашыусылар килгәйне. Болгариянан, Шумен ҡалаһынан килгән ҡунаҡтар үҙҙәренең шиғырҙарын һәм яҙмаларын ишеттерҙе. Жюри бөтәһе йөҙгә яҡын әҙәби яҙмалар менән танышты.
Яңы йылдың ял көндәрендә Башҡорт дәүләт университетында еңеүселәрҙе ҡотлау тантанаһы үтте. Башҡорт дәүләт университеты оҙаҡ йылдар Болгарияның Велико-Тырновский университеты менән тығыҙ бәйләнештә эш алып бара, шуға күрә, конкурсты ойоштороусылар еңеүселәрҙе ҡотлау тантанаһын Башҡорт дәүләт университетында үткәрергә тигән ҡарар ҡабул иткән. Еңеүселәрҙе ҡотлау церемонияһында София университетынан Симеон Гройсман ҡатнашты. «Башҡортостандың мәҙәни донъяһы» порталы