Дошманды еңеүҙең сираттағы йыллығы алдынан Өфөләге Конгресс-холда Бөйөк Ватан һуғышы ветерандарын һәм тыл хеҙмәтсәндәрен тәбрикләнеләр. Тантаналы йыйылыш күтәренке рухта уҙҙы. Унда Башҡортостан Президенты Рөстәм Хәмитов, Дәүләт Йыйылышы — Ҡоролтай Рәйесе Константин Толкачев, Хөкүмәт Премьер-министры Азамат Илембәтов, Хөкүмәт ағзалары, депутаттар, һуғыш ветерандары, дәүләт, йәмәғәт эшмәкәрҙәре, дин әһелдәре, милли-мәҙәни ойошмалар етәкселәре ҡатнашыуы оло быуынға тәрән ихтирам күрһәтеү тип ҡабул ителде. 

Ҡунаҡтарҙы, алыҫ йылдар шаңдауын ишеттергән моң-көйҙәр яңғыратып, хәрби оркестр ҡаршыланы. Тантана йортоноң фойеһында һуғыш осорон һүрәтләгән фотолар, китаптар күргәҙмәһе эшләй ине.

– Беҙҙең өсөн Еңеү көнө – 9 Майҙан да бөйөгөрәк, билдәлерәк дата юҡ. Илебеҙ халҡы яуыз, мәкерле дошманға ҡаршы тиңдәшһеҙ алышҡа күтәрелде һәм еңеп сыҡты. Бөйөк Еңеү өсөн көрәш фронтта ла, тәрән тылда ла барҙы. Һеҙгә, ветерандар, оло рәхмәтебеҙҙе, ихтирамыбыҙҙы белдерәбеҙ! Һеҙҙең алда, яуҙа һәм һуғыштан ҡайтып вафат булғандарҙың рухы алдында баш эйәбеҙ, – тине үҙенең ҡотлау телмәрендә Башҡортостан Президенты.

Рөстәм Хәмитовтың ҡотлау һүҙенән һуң ветерандарҙы тәбрикләү тантанаһын сәнғәт оҫталарының концерты дауам итте, байрам ҡунаҡтарына башҡаларҙың ҡотлауҙары еткерелде.

«Башҡортостандың мәҙәни донъяһы» порталы