«Нефтсе» мәҙәниәт һарайында мәҙәниәт һәм сәнғәт эшмәкәрҙәрен Рәсәй һәм Башҡортостандың дәүләт һәм ведомство наградалары менән бүләкләү тантанаһы үтте. Сара 25 мартта билдәләнгән Рәсәй Федерацияһының Мәҙәниәт хеҙмәткәрҙәре көнөнә арналды. 

Тантананы БР Мәҙәниәт министры вазифаһын башҡарыусы Дәүләтова Камилә Йәүҙәт ҡыҙы асты: «Бөгөн һеҙҙе ошо тантанала күреүебегә бик шатбыҙ. Мәҙәниәт һәм сәнғәт кешеләре – һәр ерҙә айырым урынды биләй. Беҙҙең көндәлек эшебеҙ халыҡҡа ҡыуаныс, шатлыҡ, байрам бүләк итеү. Һеҙҙе һөнәри байрам менән ихлас ҡотлайым һәм рәхмәтемде еткерәм. Артабан да яңынан-яңы проекттар һәм мәҙәниәт усаҡтары бер генә минутҡа ла эшмәкәрлеген туҡтатмаһын ине тигән теләктә ҡалам» - тине.

Артабан ҡотлауҙар өсөн һүҙҙе Башҡортостан Хөкүмәте Премьер-министры урынбаҫары Салауат Сәғитов алды. — Мәҙәниәт һәм сәнғәт өлкәләре – тормошобоҙҙоң айырып алғыһыҙ өлөшө. Йәмғиәтебеҙ торошо уның үҫешенә бәйле, — тине Салауат Тәлғәт улы. – Был өлкәлә проблемаларҙың күп булыуы бер кемгә лә сер түгел. Тәү сиратта, улар эш хаҡына, музыкаль мәктәп, китапхана һәм музейҙарҙың матди-техник йыһазландырылыуына ҡағыла. Быларҙың барыһы ла айырыуса иғтибар талап итә. Республика йәштәренең иң яҡшы сәнғәт өлгөләрендә тәрбиәләнеүе беҙҙең өсөн мөһим.

Барыһы 36 дәүләт наградаһы тапшырылды. Бүләкләнеүселәр араһында – М.Ғафури исемендәге Башҡорт дәүләт академия драма театрының популяр артисы Илһөйәр Ғизетдинова, Өфө «Нур» татар дәүләт театрынан уның хеҙмәттәше Рәсимә Ғәйфуллина, йырсы Флорида Исмәғилева һәм ҡурайсы Роберт Юлдашев, Башҡорт дәүләт опера һәм балет театры дирижеры Герман бар.

Үҙҙәренең һөнәри байрамын төбәктең мәҙәниәт хеҙмәткәрҙәре бишенсе тапҡыр билдәләй. Был көндө йылы ҡотлау һүҙҙәрен ижади һөнәр кешеләре, сәнғәт хеҙмәткәрҙәре, музей һәм китапхана, мәҙәниәт йорто, ҡала һәм ауыл клубтары белгестәре, художестволы үҙешмәкәр коллективтар ҡабул итә.

«Башҡортостандың мәҙәни донъяһы» порталы