22  декабрҙә, Өфөнөң «Нур» татар театрында, Самуил Маршактың әкиәт-әҫәре буйынса ҡуйылған «Бесәйгә өй» тигән спектакленең премьераһы үтәсәк.

Театрҙың мәғлүмәт хеҙмәте хәбәр итеүе буйынса, был мажаралы әкиәт-премьераны сәхнәгә сығарыу өсөн, режиссер Гүзәл Аҡбердина, спектаклде музыкаль яҡтан биҙәүсе Ришат Сәғитов, бейеүҙәрҙе ҡуйыусы Рәмизә Мөхәмәтшина һәм сценограф Азамат Ғиләжев күп кенә көс һалғандар.

Спектаклдә уйнаған артистар Өфө тамашасыһына күптән таныш инде, улар араһында Резеда Хәсәнова, Ирина Ғәниева, Фидан Биҡмурзин, Лияна Хәйретдинова һәм башҡалар.

Спектаклдең режиссеры әйтеүенсә, был әкиәттең геройҙары менән осрашыу 22 декабрҙән 6 ғинуарға тиклем дауам итәсәк. Спектаклдәр үткән ваҡытта, балалар өсөн шулай уҡ төрлө уйындар, танылған әкиәт геройҙары, Ҡыш бабай һәм Ҡарһылыу менән ҡыҙыҡлы осрашыуҙар ойоштороласаҡ.