Республикала «Ауаз» башҡорт этник мәҙәниәте һәм заманса сәнғәт фестивале ойошторола. 5 октябрҙә артистар Илеш районына йыйыла, тип хәбәр итә Башҡортостан халыҡтары ассамблеяһы.

Фестивалдә үҙешмәкәр коллективтар, ғаилә династиялары һәм биҙәү-ҡулланма сәнғәте оҫталары, студенттар һәм профессиональ башҡарыусылар, шулай уҡ саҡырылған артистар ҡатнаша. Бейеү, вокаль, инструменталь, фольклор төркөмдәре өсөн айырым конкурстар ҡаралған.

Сараның программаһы асыу тантанаһын, халыҡ кәсептәре йәрминкәһен, башҡорт халҡының һынлы сәнғәт йәрминкәһен, Башҡортостандың мәҙәниәт һәм сәнғәт эшмәкәрҙәре менән осрашыуҙарҙы, халыҡ ижады оҫталарының һәм талантлы йәштәрҙең концертын, жанр йүнәлештәре буйынса ижади оҫталыҡ кластарын, гала-концертты үҙ эсенә ала.

Ойоштороусылар — Башҡортостандың Мәҙәниәт министрлығы, Республика халыҡ ижады үҙәге, Илеш районы хакимиәте.

Арина Рәхимҡолова/«Башинформ» мәғлүмәт агентлығы