Күптән түгел Ауырғазыла “Өршәк буйы уйындары” исемле сара уҙғарылды. Төбәк байрамында Ауырғазы, Әлшәй, Дәүләкән, Миәкә, Стәрлебаш, Стәрлетамаҡ, Өфө райондары вәкилдәре ҡатнашты.

Байрам программаһында халыҡ уйындары, төрлө конкурстар, көрәш һәм башҡа спорт ярыштары ҡаралғайны. Мең ырыуы йәштәре өсөн айырым майҙанда мәғариф форумы ойошторолдо. Байрам башҡорт эстрадаһы йондоҙҙарының концерты менән тамамланды.

Быйылғы сара Башҡортостандың Мәҙәниәт министрлығы, Бөтә донъя башҡорттары ҡоролтайы, Ауырғазы районы хакимиәте һәм Төрөмбәт яҡташтар берлеге тарафынан ойошторолдо.