Башҡортостан Башлығы Радий Хәбиров Ay Yola төркөмө музыканттарына юғары исем биреү тураһындағы указға ҡул ҡуйҙы. Был хаҡта ул бөгөн Хөкүмәттең оператив кәңәшмәһендә иғлан итте.

– Республиканың мәҙәни тормошонда мөһим ваҡиға булды. Өфөнән “Ay Yola” этномузыкаль төркөмө “Һомай” хиты менән тиҙ арала донъя һәм дөйөм Рәсәй чарттарында беренсе урынға сыҡты, – тине Радий Хәбиров. – Был бик яҡшы, таныштарым уларҙың клиптарын, яңылыҡтарын ебәреп тора. Башҡортостан мәҙәниәтен үҫтереүгә ҙур өлөш индергәнегеҙ өсөн рәхмәт белдерәм.

Юғары ижади ҡаҙаныштары өсөн артистарға маҡтаулы исемдәр бирергә ҡарар ителде: Ринат Рамаҙановҡа – “Башҡортостан Республикаһының халыҡ артисы”, Адель менән Руслан Шәйхетдиновтарға – "Башҡортостан Республикаһының атҡаҙанған артисы".