Республикала “Башҡортостан тарихы биттәре” фестиваль-марафоны дауам итә. Бөгөн Өфө сәхнәһендә Хөсәйен Әхмәтов исемендәге Башҡорт дәүләт филармонияһында халыҡ ижады фестиваль-марафон сиктәрендә Краснокама районы презентациялана.

Краснокама районында тыуып үҫкән, тамырҙары ошо районға барып тоташҡан һәр милләт вәкиле осрашыуға саҡырыла.

Башҡорт дәүләт филармонияһы сәхнәһендә райондың иң яҡшы ижади коллективтары сығыш яһаясаҡ, фойела милли ризыҡтар һәм сувенирҙар, сәнәғәт ойошмалары тауарҙары күргәҙмәһе, Краснокаманың данлы үткәне һәм бөгөнгөһөнә арналған экспозиция тәҡдим ителәсәк.

Сараға рәхим итегеҙ, инеү бушлай. 

Краснокама районы- ике оло йылға – Кама менән Ағиҙел осрашҡан ерҙә урынлашҡан. 2010 йылғы Бөтә Рәсәй халыҡ иҫәбен алыу мәғлүмәттәре буйынса районда  башҡорттар — 31,3 %, мариҙар — 26,5 %, татарҙар — 25,8 %, урыҫтар — 14,7 %, башҡа милләт вәкилдәре йәшәй.