Бөгөн Өфөнөң биш кинотеатрында билдәле башҡорт режиссеры Айнур Аскаровтың “Өфөнән һөйөү менән” кинофильмы тамашасылар хөкүменә сығарыла. Был турала “Башҡортостан” телерадиокомпанияһының Медиаүҙәге ойошторған матбуғат конференцияһында хәбәр иттеләр.

Нәфис фильм Рәсәй буйлап прокатҡа сыға башлауы хаҡында хәбәрҙәр иткәйнек. Кинотаҫма ил тамашасыларына тәҡдим ителгән тәүге заманса башҡорт фильмы. Лирик комедия Мәскәү, Санкт-Петербург, Ҡаҙан һәм илдең башҡа төбәктәре кинотеатрҙарында күрһәтелә.

 «Өфөнән һөйөү менән!» — Рәсәй Кинематографистар берлеге ағзаһы Айнур Асҡаровтың тәүге тулы метражлы эше.

Матбуғат конференцияһында ҡуйыусы режиссер Айнур Асҡаров, сценарий авторы Айҙар Аҡманов, оператор Тимур Ғәниев ҡатнашты. Төп ролдәрҙе уйнаусы  йәш актерҙар Асҡар Нагаев, Эмиль Әмиров, Полина Смыковская, Анастасия Речистер журналистар һорауҙарына ихлас яуап бирҙеләр.

Фильм йәй һәм көҙ миҙгелдәре мәлендә төшөрөлгән. Кинотаҫмала Өфө ҡалаһының барлыҡ матур күренештәрен, башҡалала ойошторолған мәҙәни байрам «Симфоник төн», «Дизайн Маркет Өфө» кеүек фестивалдәрҙе күрергә мөмкин.

Айнур Асҡаров: “Фильм мәҙәни проекттарҙы тормошҡа ашырыу өсөн бирелгән Башҡортостан Башлығы грантына төшөрөлдө. Республикабыҙҙың Мәҙәниәт министрлығы, «Башҡортостан» киностудияһы, Рәсәй Кинематографистар союзы төрлө яҡлап хупланы һәм ярҙам итте”.

Ябай ауыл егетенә бәхет өсөн нимә кәрәк? Ныҡлы йорт, яратҡан ҡатын һәм өй тулы балалар. Әрме хеҙмәтен тултырып, тыуған төйәгенә ҡайтып барған Урал да яҡын киләсәктә үҙен ошондай бәхет көтәсәген белә. Ләкин бер көндө уның яҡты хыялдары ҡапыл селпәрәмә килә — баш ҡаланың сибәр егете өсөн һөйгән ҡыҙы ташлай, хатта бүләк иткән йөҙөгөн дә һата. Хәҙер Уралға Өфө буйлап ғаилә ҡомартҡыһын эҙләргә тура килә...

Гүзәл Багаева