Бөгөн билдәле композитор, күп һанлы музыкаль әҫәрҙәр авторы Салауат Низаметдиновтың тыуыуына 60 йыл. Ҡыҙғанысҡа ҡаршы  ижадтың иң бейек үрҙәренә  өлгәшеүсе моң эйәһе арабыҙҙа юҡ инде, әммә уның йырҙары халыҡ күңелендә йәшәй һәм йәшәйәсәк.Ул иҫ киткес ишетеү һәм тойоу һәләтенә эйә ине, тип хәтерләйҙәр замандаштары.

Салауат Низаметдинов күп һанлы музыкаль әҫәрҙәр авторы. Салауат Әхмәҙи улына етди сире ижадта бейек үрҙәргә өлгәшеүҙә һис тә ҡамасауламай. Ул бала саҡтан һуҡыр, әммә иҫ киткес ишетеү һәм тойоу һәләтенә эйә. Интуицияһы ярҙам итә.

Салауат Низаметдинов Учалы районының Миндәк ҡасабаһында тыуған. Өфөлә махсуслаштырылған мәктәпте тамамлай, унда тынлы оркестрҙа уйнай. Профессиональ белемде Өфө сәнғәт институтында ала, шунан һуң СССР Композиторҙар союзы ағзалығына ҡабул ителә.

Студент йылдарында уҡ Салауат Прагала Халыҡ-ара конкурста еңеү яулай. «Салауат Юлаев менән һөйләшеү» вокаль симфонияһы Чехословакияла Халыҡ-ара конкурста һәм Мәскәүҙә Халыҡ хужалығы ҡаҙаныштары күргәҙмәһенең Алтын миҙалы менән билдәләнә.

2006 йылда «Memento» операһы композиторға «Филантроп» халыҡ-ара конкурсының беренсе премияһы лауреаты, 2007 йылда Дмитрий Шостакович исемендәге Рәсәй Композиторҙар союзы премияһы лауреаты тип танылды.

Салауат Низаметдинов төрлө планлы композитор булыуға ҡарамаҫтан, уға опера яҡын була. Маэстроға  опера өҫтөндә эшләү ҙур хеҙмәт, ваҡыт һәм көс талап иткән, әммә һәр секунд  композиторға шатлыҡ һәм ҡәнәғәтлек килтергән.

Гүзәл Багаева