Сталинград һуғышының 80 йыллығын билдәләгән көндәрҙә Баймаҡ районының автоклубы «Тарихта ҡалған батырҙар!» концерт программаһы менән Төрөкмән һәм Моҡас ауылдарында булды.

Халыҡ ижады үҙәге артистары шиғырҙар һөйләне, һуғыш йылдары йырҙарын йырланы, дәһшәтле алышта ҡатнашыусыларҙың иҫтәлектәренән торған художестволы-музыкаль видео күрһәтте. Тамашасылар Дилбәр менән Руслан Хисамиевтар ғаиләһенең сығыштарын йылы ҡабул итте. Алып барыусы Ғәлинур Хәмитов башҡарыуында йөрәккә үтеп инерлек һүҙҙәр яңғыраны. Йәш быуын өсөн тарихи датаға арналған викторина ойошторолдо.

Концерт көнө Төрөкмән ауылында йәшәүсе Нәзирә Килмөхәмәтованың тыуған көнөнә тура килгән, йырсы Руслан Тимербулатов башҡарыуындағы моңло йыр уға музыкаль бүләк булып яңғыраған.

Хәтерегеҙгә төшөрәбеҙ, автоклуб "Мәҙәниәт" милли проекты сиктәрендә һатып алынды.