«Башҡортостан» дәүләт телерадиокомпанияһының «Тамыр» телеканалы тағы тоғро дуҫтарын йыйҙы. «Сәңгелдәк», «Сулпылар», «Тау-тау хәбәр», «Ә, Ю, Я ҡаласығы» , «Шәп арба», «Байтус» тапшырыуҙарын яратып ҡараған балалар «Тамыр»ҙың йыр ансамблендә шөғөлләнеүселәр, алып барыусылары, эстрада «йондоҙ»ҙары менән осрашырға «Башҡортостан» дәүләт концерт залында үткән «Вәт исмаһам кадр!» концертына йыйылды.
Йырлы-моңло тамашала Руслан Фархшатов, Руслан Ғайсаров, Сабина Кучаева, Ильнур Рамаҙанов, "Тамыр" телеканалы алып барыуслары – Асия Шахмина, Ләйсән Мәзитова, Фәрхәт Ғәйнетдинов, "Тамыр" йыр ансамбле, "Сулпылар" йыр-моң конкурсы еңеүселәре, балалар ансамблдәре һәм башҡалар ҡатнашты.
Сәхнәлә үҙҙәрен иркен тотҡан, моңло итеп йырлауҙары менән бергә матур итеп бейегән «Тамыр»ҙың тәрбиәләнеүселәренән киләсәктә артист сыҡмаҫ тимә! Тамаша ҡылырға ата-әсәләре менән бергә килгән кескәй малай-ҡыҙҙар күҙҙәрен дә алмай уларҙы күҙәтте. Ҡалала йәшәһәләр ҙә, башҡорт телен онотмаған, телеканалдың концерттарын бер йыл да ҡалдырмаған был балалар бергә ҡушылып йырларға, ихласлап сәпәкәй итергә, Фәрхәт ағайҙың уйындарында ҡатнашырға ла онотманы. Тәнәфестә барыһын да тамаша ваҡытында "төшөрөләсәк" фильмға кастинг, бағыусылар әҙерләгән тәмле күстәнәстәр, төрлө уйындар көтә ине.