«Башинформ» мәғлүмәт агентлығы хәбәр итеүенсә, донъяның виртуоз ҡумыҙсыһы Роберт Заһретдиновҡа үҙе үлгәндән һуң Рәшит Әхтәри исемендәге премия тапшырылды. Премия яҙыусылар, шағирҙар, журналистар, композиторҙар, фольклорсылар, тарихсылар, рәссамдарҙың йәмәғәтселектә танылыу алған юғары художестволы әҫәрҙәре өсөн тапшырыла. Роберт Заһретдинов ошо премияға лайыҡ булған унынсы кеше.

Премия Мәсетле районында ҡумыҙсының тыуыуына 85 йыл тулыуға арналған хәтер кисәһендә ҡыҙы Айһылыу Заһретдиноваға тапшырылды. Концертҡа уның ижадын хөрмәт итеүселәр, уҡыусылары һәм коллегалары, туғандары һәм дуҫтары, йәмәғәтселек вәкилдәре һәм ауыл халҡы йыйылды.

Сара барышында кисәнең ҡунаҡтары музыканттың тормошо һәм ижады тураһында режиссер Радик Килмәмәтовтың «Виртуоз» документаль фильмын ҡараны. I Республика ҡумыҙсылар конкурсында Гран-при яулған Энгельс Ғәлиәкбәров, Рәшит Әхтәри премияһы лауреаты, тарихсы һәм тыуған яҡты өйрәнеүсе Марат Ғафаров, тарих һәм тыуған яҡты өйрнеү музейы директоры Нәзирә Әхкәмова ҡумыҙсы менән дуҫлығы, ижади хеҙмәттәшлеге хаҡында бик күп йылы һүҙҙәр әйтте.

Мәғлүмәт өсөн: Роберт Заһретдинов —СССР һәм Рәсәйҙең бар донъяла танылыу алған атаҡлы ҡумыҙсыһы, педагог-музыкант, Башҡорт АССР-ының һәм РСФСР-ҙың атҡаҙанған мәҙәниәт хеҙмәткәре, Салауат Юлаев исемендәге дәүләт премияһы лауреаты, Салауат Юлаев ордены кавалеры.

Роберт Абдрахман улы Заһретдинов 1932 йылдың 16 Мәсетле районының Әжекәй исемле башҡорт ауылында тыуған. Бәләкәйҙән ҡумыҙ менән ҡыҙыҡһына. Тәбиғәттәге тауыштарға оҡшатып уйнарға өйрәнә. Өфө сәнғәт училищеһының халыҡ музыка ҡоралдары бүлеген, Свердловск музыка-педагогия институтын тамамлай.

1969 йылда Роберт Абдрахман улы Өфө музыка-педагогия училищеһынының баян класында эшләй башлай. Был инструмент өсөн 300-ҙән ашыу пьеса ижад итә. Ошо осорҙа уның ҡумыҙҙа уйнауға ҡыҙыҡһыныуы ҡабат уяна. Музыкант уйын ҡоралдарын үҙе яһай башлай, уларҙың яңы төрҙәрен уйлап сығара, камиллаштыра.

1991 йылда Роберт Заһретдинов Саха Республикаһында ЮНЕСКО ойошторған II Халыҡ-ара уйын ҡоралдары фестивалендә ҡатнаша, «Донъяның виртуоз ҡумыҙсыһы» исеменә лайыҡ була. Унда музыкант 22 илдән килгән 200 башҡарыусы араһынан беренсе урынды яулай һәм махсус бүләк — алтын ялатылған платинанан авторҙың үҙенә генә исемләп эшләнгән ҡумыҙ ала.

1998 йылда ул, баһалама ағзаһы булараҡ, Австрияға халыҡ-ара фестивалгә бара, унда «Ҡумыҙ буйынса халыҡ-ара класлы оҫта» тигән маҡтаулы исемгә лайыҡ була. Был уға бар донъяның теләгән бер музыка уҡыу йортонда оҫталыҡ дәресе күрһәтеү хоҡуғын бирә. Роберт Заһретдинов Австрия, Болгария, Бельгия, Голландия, Польша, Швейцарияла ошондай дәрестәр бирә. Германия, Италия, Монголия, Норвегия, Швейцария һәм Финляндияға гастролдәр ойоштора.

Роберт Заһретдиновтың репертуарында 200-ҙән ашыу әҫәр була: башҡорт, урыҫ һәм сит ил композиторҙары әҫәрҙәренең ҡумыҙ өсөн эшкәртмәләре, башҡорт халыҡ йырҙарының инструменталь варианттары, үҙенең ижад емештәре.

«Ҡумыҙҙа уйнау мәктәбе» әсбабы өсөн Роберт Заһретдинов «Джордж Сорос исемендәге халыҡ-ара премия»ға лайыҡ була. «Мелодия» фирмаһының пластинкаларына, компакт-дискыһына яҙҙырылған Р. Заһретдинов башҡарыуындағы әҫәрҙәр Башҡортостан радиоһы һәм телевидениеһы фондында һаҡлана.