21 февралдә  Башҡорт дәүләт драма театры Ватанды һаҡлаусылар көнөнә арнап билдәле актерҙар менән йылы әңгәмә ойошторасаҡ. Осрашыу байрам кәйефе бүләк итеп кенә ҡалмаҫ, ә күңелдәрегеҙҙе лә байытыр. Йыр-моңға, юморға, шиғри һүҙгә бай осрашыу кисәһен  Сара Буранбаева алып барасаҡ.

Байрам сараһында  Башҡортостандың халыҡ артисы, сабыр холоҡло, ижади күңелле артист Илдар Ғүмәров ҡатнашасаҡ. Уның ҡулдары “алтын”, “бар эштәрҙе лә үҙ ҡулдарым менән башҡарырға яратам, электр приборҙары, бәләкәй ҡул сәғәтенән алып ҙур механизмдарҙы көйләй беләм, ағас һәм тимер эштәре менән ҡыҙыҡһынам” – ти Илдар Ибраһим улы. Рәссамлыҡ һәм йырсы- композитор һәләттәре лә бар унда. “Һағынғанда”, “Һинһеҙ йәшәү-йәшәү түгел”, “Бармы ҡайтҡаның?”, “Аҡ толпар”, “Ҡош юлдары” һәм башҡа йырҙар авторы ла ул.

 “Мулла”ла - Эльбрус, “Ҡара йөҙҙәр”ҙә Ғәйфулла, “Хыялға ҡаршы” спектаклендә Саша, малай, ҡыҙ һәм башҡа спектаклдәрҙә матур образдар тыуҙырған артисыбыҙ Ринат Баймырҙин да әңгәмә биререгә әҙер. Быйыл ул Мәскәүҙең иң ҙур концерт залы тип иҫәпләнгән 6200 урынлыҡ “Крокус Сити Холл”да Салауат Юлаев образында “Юғалған аманат” исемле театрлаштырылған тамашала ҡатнашты.

Һуңғы ваҡытта эстрада йүнәлешендә лә бик әүҙем эшләгән артисыбыҙ  Артур Кәбиров тың ҡатнашыуы көтөлә. Уға ла Мәскәүҙә уҙған “Юғалған аманат” исемле тамашала ла уйнау бәхете тейҙе. Йәштәр араһында уның йырҙары, гитарала уйнап сығыш яһаған яҙмалары бик популяр. Рәми Ғарипов образын да ул сәхнәлә бик уңышлы уйнаны. Тиҙҙән Тимерхан ролендә “Нәркәс” спектаклендә уны күрерһегеҙ, тип ышанабыҙ һәм февраль айын ул “Ут биреп торған сағым” исемле акустик концерт менән тамамлаясаҡ.

 “Хыялға ҡаршы” спектакленән тамашасыларға бик яҡшы таныш актер Айҙар Шәмсетдинов менән осрашыу ҡыҙыҡлы булмаҡсы.  Әрме хеҙмәте тураһында ла Айҙар күп һөйләй ала, сөнки һалдат бутҡаһы, марш-бросоктар әле уның хәтеренән юйылып та бөтмәгән. Байрам ойоштороусылар– бик ҡыҙыҡлы әңгәмәселәр буласаҡ!

Осрашыуҙа илһөйәрлек, тыуған ергә һөйөү, ижад һәм мөхәббәт хаҡында һүҙ барасаҡ. Баян көйҙәренә, гитара ҡылдарына ҡушылып йырларға, күңелле ял итергә теләһәгеҙ, 21 февраль көнө Башҡорт драма театрына рәхим итегеҙ!