Башҡорт дәүләт опера һәм балет театры артистары Европалағы гастролдәрҙән ҡайтты. Оҙайлы тур ике ай самаһы дауам итте. Ошо ваҡыт эсендә балет труппаһы спектаклдәр менән Францияның, Бельгияның һәм Люксембургтың иң яҡшы сәхнәләрендә сығыш яһаны. Башҡорт дәүләт опера һәм балет театрының ҙур турнеһы 3 мартта Францияла башлана. Европа тамашасыһына билдәле "Аҡҡош күле" балеты тәҡдим ителде. “Аҡҡош күле”- рус классик бейеүенең камил һәм саф өлгөһө. Солистар һәм кордебалет артистары өсөн был балетта бейеү үҙенә күрә бер төрлө өлгөргәнлек аттестаты алыуға тиң. “Аҡҡош күле” - матур һәм һоҡландырғыс тамаша. Ул хәрәкәттәр, пластика, линиялар матурлығы. Петр Чайковскиҙың үлемһеҙ музыкаһы аҫтында барлыҡҡа килгән хәрәкәттәр мөғжизәле бейеү донъяһына һәр кемде һис шикһеҙ алып китә.