28 ғинуарҙа Мәжит Ғафури исемендәге Башҡорт академия драма театрында Башҡортостандың халыҡ яҙыусыһы, драматург, Рәсәйҙең әҙәбиәт һәм сәнғәт өлкәһендәге дәүләт премияһы лауреаты, Башҡортостандың Салауат Юлаев исемендәге дәүләт премияһы лауреаты, республиканың атҡаҙанған сәнғәт эшмәкәре Флорид Бүләковтың хәтер кисәһе уҙҙы.

Яҙыусылар, мәҙәниәт эшмәкәрҙәре, драматургтың яҡындары һәм яҡташтары, уның ижадын һөйөүселәр драматургты иҫкә алырға йыйылды. Кисәнең беренсе өлөшөнә Флорид Әхмәтулла улының «Драматург көндәлеге»нән яҙмалар ингән. Уларҙы Башҡорт драма театры актерҙары уҡыны. Драматургтың уй-фекерҙәре һәм хәтирәләре уның пьесалары буйынса ҡуйылған спектаклдәрҙән өҙөктәр менән алмашынып барҙы. Уларҙы Мәжит Ғафури исемендәге Мәжит Ғафури исемендәге Башҡорт академия драма театры, Арыҫлан Мөбәрәков исемендәге Сибай башҡорт драма театры, Салауат башҡорт драма театры, Илшат Йомағолов исемендәге Стәрлетамаҡ башҡорт драма театры, Туймазы татар драма театры артистары тәҡдим итте.

Кисәнең икенсе өлөшө Флорид Бүләков тураһында иҫтәлектәргә арналды. Башҡортостан Яҙыусылар союзы рәйесе Айгиз әйтеүенсә, быйыл яҙ Өфөлә ойошманың яңыртылған бинаһы асыла, уның икенсе ҡатында әҙәби галерея барлыҡҡа киләсәк, һәм, әлбиттә, башҡа сағыу исемдәр менән бер рәттән Флорид Бүләковтың исеме лә айырым урын биләйәсәк.

– Башҡорт әҙәбиәте тарихында ике яҙыусы драматургияла киң танылыу алды һәм Башҡортостандан икеһе генә Рәсәйҙең әҙәбиәт һәм сәнғәт өлкәһендәге дәүләт премияһына лайыҡ булды. Улар – Мостай Кәрим һәм Флорид Бүләков. Ошо ике яҙыусы беҙҙең милли драматургияны данланы, – тип һыҙыҡ өҫтөнә алды Айгиз Баймөхәмәтов.

Флорид Бүләков пьесалары буйынса спектаклдәр һәм телесериалдар философик тәрәнлек менән генә түгел, моңлолоғо менән дә айырылып тора. Күп йырҙар һәм көйҙәр үлемһеҙ хиттарға әүерелде. Был кистә ҡайһы бер йырҙар Башҡортостандың халыҡ артистары Нәзифә Ҡадирова, Гөлсәсәк Шәрипова һәм Азат Йыһаншин башҡарыуында яңғыраны. Драматургтың яратҡан башҡорт халыҡ йырҙарының береһе «Таштуғай»ҙы Башҡортостандың халыҡ артистары Сәғиҙулла Байегет (ҡурай) һәм Алһыу Бәхтиева башҡарҙы.

Хәтер кисәһен мишкәләр хорының сығышы ла биҙәне. Флорид Миңнулла улының тыуған Мишкә районы өсөн гимн ижад итеүен, ә 1969 – 1973 йылдарҙа район мәҙәниәт йорто ҡарамағындағы «Эрвел» халыҡ бейеү ансамбленең ойоштороусыһы һәм музыкаль етәксеһе булыуын белеү күп тамашасылар өсөн асыш булды.

– Флорид Бүләковтың ижады Башҡортостан театрҙары үҫешенә көслө йоғонто яһаны. Ул республикалағы һәр театрҙың ихтыяжын һәм үҙенсәлектәрен белә ине, улар менән ҡулға-ҡул тотоноп эшләне. Башҡортостан һәм Татарстан театрҙарында уның әҫәрҙәре буйынса спектаклдәр ҡуйҙым. Флорид Миңнулла улының пьесалары режиссерҙарға фантазия өсөн киңлек бирә, образдарҙың тулылығы менән йәлеп итә, идеяһы һәм фәлсәфәһе менән илһамландыра. Әлеге көнгә Флорид Бүләковтың пьесалары буйынса спектаклдәр Рәсәйҙең, Ҡаҙағстандың, Белоруссияның, Литваның һәм БДБ илдәренең 150-нән ашыу театрында ҡуйылған, – тип билдәләне кисәнең режиссеры, Башҡортостандың атҡаҙанған артисы Илсур Ҡаҙаҡбаев.

Кисәнең сценарийы авторы – Динара Кәйүмова, рәссам – Альберт Нестеров, музыкаль биҙәүсе – Урал Иҙелбаев, хореограф – Алина Мостаева, видеоконтентты төшөрөүселәр – Руслан Юлтаев һәм Илгиз Ғәлимов.

Фото: Руслан Юлтаев.