Моң һәм сәнғәт белгестәре Абдулла Афзал улының тауышын Урал тауҙарын иңләп осҡан ҡыйғыр бөркөт бейеклеге менән тиңләй. Ҡурайҙа оҫта уйнаған Аблулла Солтановтың тауыш диапазоны, башҡарыу маһирлығы, күкрәктән сыҡҡан илаһи моңо үҙенсәлекле, тәрән драматизм, халыҡсан моң менән һуғарылған йырҙарын төрлө ҡитғаларҙа яратып тыңлайҙар.

Танылған йырсылар менән бер сәхнәлә йәш ижадсылар ҙа халыҡ йырҙарын башҡарҙы.Тимәк, Абдулла Солтанов өлгөһөндә тәрбиәләнеүсе йәштәргә үҫеү, ил, халыҡ-ара кимәлдә танылыу өсөн мөмкинлектәр киң. Абдулла Солтанов репертуарында 60 -тан ашыу башҡорт халыҡ йырҙары. Улар араһында тарихи темаға арналғандары « ҡасҡындар хаҡындағылары, ҡатын-ҡыҙҙың аяныслы яҙмышы хаҡындағылары бер-нисә быуын тамашасыларҙы һоҡландыра, уйланырға һәм хисләнергә мәжбүр итә.

Абдулла Солтанов Өфө, Һамар, Ульяновск, Мәскәү ҡалаларында, Германия, Польша, Франция, Португалия, Румыния һәм яҡын сит ил сәхнәләрендә уңыш ҡаҙана. Мәшһүр йырсы башҡарыуындағы башҡорт халыҡ йырҙары «Башҡортостан» дәүләт телевидение һәм ралиотапшырыуҙар компанмяһының алтын фондына ингән.

Абдулла Солтанов башҡорт халыҡ йырҙарын киң диапазонда, йөрәк түренән сыҡҡан моң менән иркен башҡарыусы йыраусы. Башҡортостандың халыҡ артисы, остаз, аҡһаҡал ижады йәштәр өсөн ҙур мәктәп булһа, ә төрлө ҡитғаларҙа йәшәгән тамашасылар өсөн ул йыһан менән ерҙе тоташтырыусы мәшһүр йырсы булараҡ ҡәҙерле һәм яҡын.